Plaid Cymru Dwyfor Meirionnydd Liz Saville Roberts AS a Mabon ap Gwynfor AS

Mae’r newyddion fod yr Eisteddfod Genedlaethol am ddod i Boduan, Llŷn, yn 2021 wedi cael ei groesawi’n arw gan arweinwyr cymunedol yn yr ardal.

Meddai Liz Saville Roberts, Aelod Seneddol Dwyfor Meirionnydd a chyn gynghorydd dros ward Morfa Nefyn: “Mae hyn yn newyddion rhagorol, ac rwy’n edrych ymlaen yn arw i groesawi’r Eisteddfod i Foduan.

“Rhaid diolch i’r gwahanol dir-feddianwyr yn yr ardal am eu cydweithrediad gyda’r Eisteddfod, ac hefyd i Gyngor Sir Gwynedd am eu gwaith trwyadl yn paratoi’r cais.

“Mae gan Boduan y fantais o fod yn le sych gyda hinsawdd mwyn iawn gan fod yn gyfleus i Nefyn a Phwllheli.

“Mae Llŷn ac Eifionydd yn ardal hynod sydd a chyfoeth o hanes a diwylliant yn perthyn iddi, ac rwy’n edrych ymlaen yn arw am y cyfle i ddangos godidowgrwydd yr ardal i bobl Cymru. Bydd yna groeso cynnes i bobl o bob cwr o Gymru a thu hwnt ym Moduan yn 2021."

Meddai Mabon ap Gwynfor, ymgeisydd Plaid Cymru ar gyfer y Cynulliad Cenedlaethol yn Nwyfor Meirionnydd: “Mae hyn yn newyddion arbennig o dda i’r ardal.

“Mae’r Eisteddfod yn dod a budd economaidd ond hefyd budd diwylliannol i unrhyw ardal. Bydd yr ardal hon yn cael budd, heb os, ond rwy’n sicr y caiff yr Eisteddfod a’i hymwelwyr fudd amhrisiadwy drwy ymweld a Llŷn ac Eifionydd. 

"Mae am fod yn her o ran yr isadeiledd, gan sicrhau fod y trafnidiaeth yn rhedeg yn llyfn, ond dangosodd yr Eisteddfod Genedlaethol eu bont yn medru dygymod a phob math o her yn ddiffwdan yn yr Eisteddfod wych a gafwyd yn Llanrwst eleni. Mae yna ddwy flynedd caled o waith o’n blaenau rwan wrth baratoi i groesawu’r Eisteddfod i Foduan, ond mae pawb yn edrych ymlaen at y dasg er mwyn sicrhau y cawn yr Eisteddfod orau posib yma yn 2021.

“Mae’r ardal eisoes yn nodedig am ei harddwch eithriadol, ond caiff Eisteddfodwyr gyfle i brofi cynhesrwydd a chroeso pobl yr ardal. Mi fydd Eisteddfod Boduan yn 2021 yn wych, mae hynny’n sicr”.