Plaid Cymru Dwyfor-Meirionnydd Plaid Cymru - yn ymladd dros Ddwyfor-Meirionnydd

Mae Aelod Seneddol Plaid Cymru, Liz Saville Roberts, wedi galw ar Fwrdd Iechyd Prifysgol Betsi Cadwaladr i sefydlu canolfannau profi cymunedol lleol pwrpasol ar gyfer pobl sy'n byw yn ardal Dwyfor a Meirionnydd sydd â symptomau Covid-19. 

Er bod y Bwrdd Iechyd wedi ymrwymo i agor canolfan brofi ym Mangor, nid oes darpariaeth barhaol ar gyfer y rhai sy'n byw yn Nwyfor a Meirionnydd, gyda'r canolfannau profi gweithredol amgen agosaf yn Aberystwyth a Llandudno. 

Dywedodd Liz Saville Roberts AS, 

‘O ystyried yr angen hanfodol am brofion ehangach, siawns mai rwan yw’r amser i edrych ar sefydlu canolfannau profi cymunedol pwrpasol i ddarparu cyfleusterau lleol, hygyrch i boblogaeth ehangach Gwynedd i gael eu profi.’ 

'Gydag achosion ar gynnydd a gaeaf heriol yn debygol iawn, mae pobl sy'n byw yn fy etholaeth wledig yn haeddu sicrwydd pe byddent yn mynd yn sâl ac angen prawf, yna byddai ganddynt fynediad parod i un mor agos i'w cartref â phosib.' 

'Mae cwestiwn sylfaenol yma ynghylch y ffordd orau o ddarparu gwasanaeth profi ehangach i'r cyhoedd. Os yw eisoes yn bosib profi rhai pobl yn eu cymuned, rhaid cwestiynu’r rhesymeg y tu ôl i’w gwneud yn ofynnol i eraill deithio pellteroedd i gael prawf?’ 

‘Bydd llawer o bobl sydd angen prawf eisoes yn sâl, ac ymddengys bod y siwrnai ychwanegol a osodir arnynt fel arall yn dangos diffyg tosturi yn ogystal â bod yn ddiangen.’ 

'Mae Bangor er enghraifft, yn bell i lawer o boblogaeth Dwyfor a Meirionnydd, sef rhanbarth fwyaf deheuol ardal Bwrdd Iechyd Prifysgol Betsi Cadwaladr.' 

'Beth sy'n atal mwy o ddefnydd o Ysbyty Alltwen, Tremadog, ar gyfer profi aelodau'r cyhoedd yn ogystal â gweithwyr allweddol?' 

'Rwy'n deall bod y Bwrdd Iechyd eisoes yn barod i gynnig profion i'r cyhoedd os na allant gael mynediad at brofion yn rhywle arall, ond nid yw'n eglur sut mae pobl yn cael gwybod am y trefniant hwn, a hefyd sut maent yn gofyn am brofion.' 

'Dylai llywodraeth Cymru lynnu at eu haddewid y dylai pawb gael mynediad i brawf Covid-19 o fewn ugain milltir i'w cartref - hyd yma, nid ydynt wedi cwrdd â’r ymrwymiad yma.’