Plaid Cymru Dwyfor-Meirionnydd Plaid Cymru - yn ymladd dros Ddwyfor-Meirionnydd

Bydd buddsoddiad o dros £500,000 yn digwydd i adeilad celfyddydol eiconig ym Mhwllheli, er lles trigolion Llŷn a’r ardal yn ôl aelod cabinet Plaid Cymru dros gymunedau a datblygu economi ar Gyngor Gwynedd, Gareth Thomas yr wythnos hon (10 Mawrth).

Cefnogodd cabinet Cyngor Gwynedd argymhelliad y Cynghorydd i fuddsoddi £570,000 yn Neuadd Dwyfor gan gynnig darpariaeth amlbwrpas flaengar o fewn y gofod i drigolion lleol ar ffurf theatr, sinema a llyfrgell.

Yn dilyn gwaith achos busnes manwl dros y misoedd diwethaf rhwng swyddogion y Cyngor ar y cyd ag aelodau o’r gymuned leol, gwelwyd bod potensial i gynyddu’r 52,000 o ddefnyddwyr* sy’n ymweld â Neuadd Dwyfor yn flynyddol wrth wella’r ddarpariaeth ar y safle.

“Mae’n gyfnod cyffrous i dref Pwllheli, ac i Neuadd Dwyfor,” eglura’r Cynghorydd Gareth Thomas.

“Wedi cyfnod o bryder ynglŷn ag ariannu’r adnodd yn y dref dros y blynyddoedd diwethaf, dwi’n falch iawn bod cynllun manwl mewn lle a buddsoddiad ariannol yn cael ei sicrhau i’r adeilad diwylliannol, cymunedol ac addysgol yma.

“Wedi’r penderfyniad, gallwn fynd ati i roi’r cynllun ar waith dros y misoedd nesaf i edrych ar ail ddylunio a dodrefnu gofod y Llyfrgell a chreu toiled sy’n fwy hwylus ar gyfer defnyddwyr. Bydd y cyntedd yn cael ei adnewyddu i greu gofod mwy croesawgar a chreu caffi a bar ar y lleoliad i fynychwyr ei ddefnyddio a’i fwynhau.

“Hefyd, bydd seddi mwy cyfforddus sy’n symud i’w lle ac yn symud o’r neilltu i sicrhau bod gofod hyblyg ar gael ar gyfer perfformiadau a digwyddiadau amrywiol o fewn y theatr. A bydd balwstrad gwydr yn cael ei ychwanegu i’r balconi i ddiogelu cynulleidfa a gwella profiad ymwelwyr sy’n gwylio perfformiadau o’r seddi.

“Wrth gwrs, bydd angen cefnogaeth gan y gymuned i wireddu’r weledigaeth sydd gennym ar gyfer y Neuadd, gan mai eu hadnodd nhw yw Neuadd Dwyfor yn y pen draw. O wella’r adnoddau, y gobaith yw y bydd trigolion lleol yn perchnogi’r gwaith o ddefnyddio a hyrwyddo’r lleoliad, ac yn manteisio ar neuadd amlbwrpas sy’n hwb i ddigwyddiadau Cymraeg a Chymreig yn yr ardal.

“Mae’n adnodd pwysig hefyd ar gyfer y miloedd o ymwelwyr sy’n dod i’r ardal yn flynyddol.

“Dwi’n edrych ymlaen at ymweld â Neuadd Dwyfor yn ystod yr hydref i weld yr adeilad ar ei newydd wedd,” meddai’r Cynghorydd Gareth Thomas.