Plaid Cymru Dwyfor Meirionnydd Liz Saville Roberts AS a Mabon ap Gwynfor AS

Dyma sut y gall cymunedau neu sefydliadau gael mynediad i'r £500,000 y mae'r Llywodraeth yn ei neulltuo tuag at beiriannau diffibrilio.

Gofynnodd Mabon ap Gwynfor, Aelod o'r Senedd dros Ddwyfor Meirionnydd y cwestiwn i'r Gweinidog Iechyd.

Meddai Mabon: "Sut y gall cymunedau neu sefydliadau gael mynediad i'r £500,000 y mae'r Llywodraeth yn ei neulltuo tuag at beiriannau diffibrilio, a phwy fydd yn penderfynu ar sut y bydd y pres yn cael ei ddyranu?"

Wrth ymateb i'r cwestiwn, dywedodd Eluned Morgan, Y Gweinidog Iechyd:

"Mae Ymddiriedolaeth GIG Gwasanaethau Ambiwlans Cymru ac Achub Bywydau Cymru yn defnyddio’r £500,000 o gyllid ychwanegol a gyhoeddwyd gennyf i weithio mewn partneriaeth i brynu bron i 500 o diffibrilwyr. Bydd grwpiau a sefydliadau cymunedol yn gallu gwneud cais i gael y ddyfais hon, a bydd y ffurflen gais ar gael maes o law; fodd bynnag gall grŵp a sefydliadau gofrestru eu diddordeb mewn cael y ffurflen drwy e-bostio: [email protected].

Rhaid i bob sefydliad sy’n dymuno gwneud cais fodloni nifer o feini prawf ynglŷn â mynediad, gan gynnwys cadarnhau’r gofynion canlynol:

· Nid oes unrhyw ddiffibriliwr o fewn 500m i’r safle arfaethedig;

· Bydd y sefydliad yn prynu cabinet a wresogir ar gyfer y diffibriliwr, a bydd hwnnw’n cael ei osod ar wal allanol mewn man y mae mynediad ato 24 awr y dydd;

· Darperir cyflenwad trydan addas er mwyn sicrhau bod y diffibriliwr yn cael ei gynnal ar y tymheredd cywir i atal y batri a’r padiau rhag dirywio;

· Bydd y diffibriliwr ar gael i’r cyhoedd ei ddefnyddio 24 awr y dydd;

· Bydd y sefydliad yn cofrestru’r diffibriliwr yng nghronfa ddata The Circuit;

· Bydd yn penodi gwarcheidwad ar gyfer y diffibriliwr (i’w gynnal a’i gadw yn rheolaidd);

· Trefnir sesiynau ymwybyddiaeth i ddysgu sgiliau adfywio cardio-pwlmonaidd/defnyddio diffibriliwr i unigolion sy’n rhan o’r sefydliad neu’r grŵp.