Plaid Cymru Dwyfor Meirionnydd Liz Saville Roberts AS a Mabon ap Gwynfor AS

AS Plaid Cymru yn galw am fesurau lliniaru digonol i warchod cymunedau gwledig rhag toriadau anghymesurol

Mae AS Plaid Cymru dros Dwyfor Meirionnydd, Liz Saville Roberts, wedi annog un o brif ddarparwyr peiriannau arian y DU i amddiffyn cymunedau gwledig, wrth iddynt symud ymlaen â chynllun i newid miloedd o beiriannau arian di-dâl gan gynnwys 3 yn ei hetholaeth.

Mewn llythyr at yr AS, cadarnhaodd NoteMachine gynlluniau i drosi 3,000 o’u 7,000 o beiriannau arian di-dâl i rai sy’n codi ffȋ yn dilyn toriadau olynol i’r ffȋ cyfnewidfa LINK - y ffȋ a delir gan fanciau i ddarparwyr ATM am dynnu arian allan.

Dywedodd NoteMachine, er gwaethaf 2 ½ blynedd o annog llywodraeth y DU i ymyrryd, mae cynnal peiriannau ATM rhad ac am ddim bellach yn ‘economaidd anymarferol.

Mae Liz Saville Roberts AS, a ymgyrchodd yn llwyddiannus i amddiffyn sawl peiriant arian yn ei hetholaeth, wedi annog darparwyr ATM i warchod ardaloedd gwledig rhag toriadau yn y dyfodol, gan alw am fesurau lliniaru digonol i sicrhau fod cwsmeriaid yn parhau i gael mynediad at arian parod.

Mae hi hefyd wedi codi pryderon penodol ynghylch mynediad at arian parod yn Harlech, sef un o'r ardaloedd a gafodd eu taro galetaf o ran darpariaeth ATM am ddim, pellter i'r gangen banc agosaf a chysylltedd gwael ac annibynadwy.

Dywedodd Liz Saville Roberts AS: ‘Mae’n feirniadaeth ddamniol o’r llywodraeth Torïaidd bod darparwyr peiriannau arian wedi’u rhoi yn y fath sefyllfa fel eu bod bellach yn cael eu gadael heb unrhyw ddewis ond dechrau trosi cyfran o’u peiriannau i rai sy’n codi ffȋ defnydd.’

‘Y cymunedau tlotaf a’r bobl fwyaf bregus sy’n debygol o gael eu heffeithio fwyaf o ganlyniad i’r gostyngiad hwn mewn mynediad am i arian am ddim.’

‘Tra bod arferion cwsmeriaid yn newid, mae angen sicrhau mynediad at arian i gymunedau gwledig, a bydd colli peiriannau ATM am ddim, yn ergyd fawr i fusnesau lleol.’

‘Nid yn unig mae’n annheg i bobl orfod talu i gael eu harian eu hunain allan, ond bydd cwsmeriaid rwan yn wynebu teithio ymhellach i fedru tynnu arian allan am ddim.’

‘Os yw ein peiriannau arian yn wynebu bygythiadau pellach, yna bydd llawer o bobl yn brwydro i gael gafael ar yr arian sydd ei angen arnynt - gyda chanlyniadau difrifol i gymunedau a busnesau.’

‘Ni all ein cymunedau ddygymod â cholli mwy o’r peiriannau arian y mae busnesau a phobl leol yn dibynnu arnynt. Mae Harlech yn un gymuned yn fy etholaeth lle mae mynediad at arian parod yn bryder dybryd.’